କୋଣାର୍କ ସୂର୍ଯ୍ୟମନ୍ଦିର ପରିସରରେ କାଜୁ ନାଁରେ ନକୁଳଦାନା ବିକ୍ରି
କୋଣାର୍କ : ୟୁନେସ୍କୋ ବିଶ୍ୱ ଐତିହ୍ୟ ସ୍ଥଳ ଭାବେ ପରିଚିତ କୋଣାର୍କ ସୂର୍ଯ୍ୟମନ୍ଦିର ପରିସରରେ ପର୍ଯ୍ୟଟକଙ୍କୁ ଠକେଇ କରାଯାଉଥିବା ଘଟଣା ପୁଣିଥରେ ସାମ୍ନାକୁ ଆସିଛି। ରାସ୍ତାକଡ଼ ବ୍ୟବସାୟୀ ଓ କିଛି ଦୋକାନଦାର “ପ୍ରିମିୟମ୍ କାଜୁ” ନାମରେ ଉଚ୍ଚ ମୂଲ୍ୟର ପ୍ୟାକେଟ୍ ବିକ୍ରି କରି ପର୍ଯ୍ୟଟକଙ୍କୁ ଧୋକା ଦେଉଥିବା ଅଭିଯୋଗ ହେଉଛି। ସୂଚନା ଅନୁଯାୟୀ, ୫୦୦ରୁ ୬୦୦ ଟଙ୍କା ମୂଲ୍ୟରେ ବିକ୍ରି ହେଉଥିବା ଏହି ପ୍ୟାକେଟ୍ଗୁଡ଼ିକ ଖୋଲିଲା ପରେ ପର୍ଯ୍ୟଟକମାନେ ଦେଖୁଛନ୍ତି ଯେ ଭିତରେ କେବଳ ଉପରେ କିଛି କାଜୁ ରଖାଯାଇଛି, ଯେଉଁଥିରେ ତଳଭାଗରେ ନକୁଳ ଦାନା, ଖୁସ୍ଖୁସ୍ (ପୋଷ୍ଟା), ଏଲାଇଚି ଦାନା ବା ଅନ୍ୟ ନିମ୍ନମାନର ଜିନିଷ ଭରାଯାଇଛି। କେତେକ ମାମଲାରେ କାଜୁ ପଚିଯାଇଥିବା ଓ ଖାଦ୍ୟ ଉପଯୋଗ ଅଯୋଗ୍ୟ ଥିବା ଅଭିଯୋଗ ମଧ୍ୟ ଆସିଛି। ଏହି ଠକେଇ ଘଟଣା ସୋସିଆଲ୍ ମିଡିଆ ପ୍ଲାଟଫର୍ମ—ଏକ୍ସ, ଫେସବୁକରେ ଭାଇରାଲ୍ ହେବା ପରେ ରାଜ୍ୟସ୍ତରରେ ଆଲୋଚନା ତୀବ୍ର ହୋଇଛି। ଅନେକ ପର୍ଯ୍ୟଟକ ନିରାଶା ପ୍ରକାଶ କରି କହୁଛନ୍ତି ଯେ ଏଭଳି ଅନୁଭବ ହେବା ପରେ ସେମାନେ ଆଉ କୋଣାର୍କ କିମ୍ବା ଓଡ଼ିଶାକୁ ଆସିବାକୁ ଇଚ୍ଛୁକ ନୁହଁନ୍ତି। ଏହା ଓଡ଼ିଶାର ପର୍ଯ୍ୟଟନ ଛବିକୁ ଜାତୀୟ ସ୍ତରରେ କ୍ଷତିଗ୍ରସ୍ତ କରୁଛି। ବର୍ଷ ବର୍ଷ ଧରି ଏଭଳି ଅଭିଯୋଗ ଆସୁଥିବା ସତ୍ତ୍ୱେ ପୁରୀ ଜିଲ୍ଲା ପୋଲିସ୍, ଟୁରିଷ୍ଟ୍ ପୋଲିସ୍ ଓ ପ୍ରଶାସନ ପକ୍ଷରୁ କଡ଼ା ଓ ସ୍ଥାୟୀ ପଦକ୍ଷେପ ନ ନିଆଯାଇଥିବାରୁ ଦୁର୍ବୃତ୍ତମାନେ ନିର୍ଭୀକ ହୋଇପଡ଼ିଥିବା ସ୍ଥାନୀୟଲୋକେ ଅଭିଯୋଗ କରୁଛନ୍ତି। ଆଇନ ବିଶେଷଜ୍ଞମାନଙ୍କ ମତରେ, ଏଭଳି ଠକେଇ ଭାରତୀୟ ଦଣ୍ଡ ସଂହିତାର ଧାରା ୪୨୦, ୪୧୫/୪୧୭, ଉପଭୋକ୍ତା ସୁରକ୍ଷା ଆଇନ–୨୦୧୯ ଏବଂ ଏଫ୍ଏସ୍ଏସ୍ଏଆଇ ନିୟମ ଅନୁଯାୟୀ ଦଣ୍ଡନୀୟ ଅପରାଧ। ଓଡ଼ିଶା ପର୍ଯ୍ୟଟନ ବ୍ୟବସାୟ ନିୟମାବଳୀ ଅନୁଯାୟୀ ମଧ୍ୟ ଲାଇସେନ୍ସ ବାତିଲ୍ କରାଯାଇପାରେ। କୋଣାର୍କ ବିଜ୍ଞାପିତ ଅଞ୍ଚଳ ରାସ୍ତା ବ୍ୟବସାୟ ଜୋନ୍ ନିୟନ୍ତ୍ରଣ ଓ ଅନଧିକୃତ ଷ୍ଟଲ୍ ହଟାଇବାର ଦାୟିତ୍ୱରେ ରହିଛି। ଯଦିଓ ଏନଏସି ସହଯୋଗୀ ଭୂମିକା ନିଭାଇପାରେ, ଏହି ଠକେଇ ନେଟ୍ୱର୍କରେ ସେମାନଙ୍କ ସିଧାସଳଖ ସମ୍ପୃକ୍ତତାର କୌଣସି ପ୍ରମାଣ ମିଳିନାହିଁ।
ବିଜେପି କୃଷକ ମୋର୍ଚ୍ଚା ଓଡ଼ିଶା ରାଜ୍ୟ ସମ୍ପାଦକ ପ୍ରଶାନ୍ତ ସ୍ୱାଇଁ(ଲୁଲୁ) ମୁଖ୍ୟମନ୍ତ୍ରୀ, ଡିଜିପି, ପୁରୀ ଏସ୍ପି, ଜିଲ୍ଲାପାଳ ଓ ପର୍ଯ୍ୟଟନ ନିର୍ଦ୍ଦେଶକଙ୍କୁ ଚିଠି ଲେଖି ତୁରନ୍ତ କଡ଼ା ପଦକ୍ଷେପ ନେବାକୁ ଦାବି କରିଛନ୍ତି। ଠକେଇରେ ସମ୍ପୃକ୍ତ ବ୍ୟକ୍ତିଙ୍କ ବିରୋଧରେ ଏଫ୍ଆଇଆର୍ ଓ ଗିରଫଦାରୀ,ନିୟମିତ ଚଢ଼ାଉ, ମୂଲ୍ୟ ତାଲିକା ଓ ଚେତାବନୀ ବୋର୍ଡ୍ ବ୍ୟବସ୍ଥା ସହ ପର୍ଯ୍ୟଟକ ପୋଲିସ୍ ସଂଖ୍ୟା ବୃଦ୍ଧି ଓ ସଚେତନତା ଅଭିଯାନ ମାଧ୍ୟମରେ ପର୍ଯ୍ୟଟନ ବିଶେଷଜ୍ଞମାନେ ସତର୍କ କରାଇଛନ୍ତି ଯେ ଏଭଳି ଘଟଣା ଉପରେ ଶୀଘ୍ର ଓ କଡ଼ା କାର୍ଯ୍ୟାନୁଷ୍ଠାନ ନ ହେଲେ କୋଣାର୍କ ସହ ଓଡ଼ିଶାର ପର୍ଯ୍ୟଟନ ଅର୍ଥନୀତି ଦୀର୍ଘକାଳୀନ କ୍ଷତିର ସମ୍ମୁଖୀନ ହେବ। ଏହି ମାମଲାରେ ପ୍ରଶାସନ ପକ୍ଷରୁ ଏପର୍ଯ୍ୟନ୍ତ କୌଣସି ଔପଚାରିକ ପ୍ରତିକ୍ରିୟା ମିଳିନାହିଁ। କୋଣାର୍କ ସହରରେ ବୁଲି ବୁଲି ପର୍ଯ୍ୟଟକଙ୍କୁ ପୋସ୍ତକ ନାଁରେ ଘାସ ଦାନା ବିକ୍ରି କରୁଥିବା ଅଭିଯୋଗରେ କୋଣାର୍କ ପୋଲିସ୍ ଜଣଙ୍କୁ ଥାନାରେ ଅଟକ ରଖି ତଦନ୍ତ ଜାରି ରଖିଛି। ଏନେଇ କୋଣାର୍କ ପୋଲିସ ପକ୍ଷରୁ ସୂଚନା ଦିଆଯାଇଛି। କିନ୍ତୁ ନକଲି କାଜୁ ବେପାରୀ ବର୍ତ୍ତମାନ ପର୍ଯ୍ୟନ୍ତ ଧରା ପଡି ନାହାଁନ୍ତି।
