ସୁଭଦ୍ରା ଶକ୍ତି ମେଳା ଶକ୍ତି ପ୍ରଦର୍ଶନ ର ମାଧ୍ୟମ

କୋଣାର୍କ : ସୁଭଦ୍ରା ଶକ୍ତି ମେଳା ପ୍ରତିଭା ଓ ଦକ୍ଷତା ପ୍ରଦର୍ଶନର ଶକ୍ତି କ୍ଷେତ୍ର ପାଲଟିଛି।ଆମେ ଯେଉଁ ଉତ୍ପାଦ କରୁଛୁ ତାହାର ପ୍ରଦର୍ଶନ ଓ ବିକ୍ରି ସୁଭଦ୍ରା ଶକ୍ତି ମେଳାରେ କରିବା ସହ ଆମ ଆର୍ଥିକ ସ୍ଥିତି କୁ ମଜବୁତ କରି ପାରୁଛୁ ବୋଲି କହିଛନ୍ତି ଉତ୍ପାଦକ ଗୋଷ୍ଠୀର ମା ମାନେ। କୋଣାର୍କ ଚନ୍ଦ୍ରଭାଗା ଠାରେ ଆୟୋଜିତ ହେଉଛି ସୁଭଦ୍ରା ଶକ୍ତି ମେଳା ଗତ ୧ ତାରିଖ ଠାରୁ ଏହାର ଶୁଭାରମ୍ଭ ହୋଇଥିବା ବେଳେ ଚଳିତ ମାସ ୭ ତାରିଖ ପର୍ଯ୍ୟନ୍ତ ଏହା ଚାଲିବ। ରାଜ୍ୟର ବିଭିନ୍ନ ଜିଲ୍ଲା ର ସ୍ୱୟଂସହାୟକ ଗୋଷ୍ଠୀ ସେମାନଙ୍କ ଉତ୍ପାଦକକୁ ଏଠାରେ ପ୍ରଦର୍ଶିତ କରି ଲୋକ ମାନଙ୍କୁ ଆକୃଷ୍ଟ କରୁଛନ୍ତି। କୋରାପୁଟରୁ ଆସିଥିବା ବିନାୟକ ଗୁଣ୍ଠ ଯିଏ ପାରମ୍ପରିକ ଖାଦ୍ୟ ଶସ୍ୟ ଓ ମସଲା,ଦେଶୀ ନାଲି ଚାଉଳ ହଳଦୀ,ମାଣ୍ଡିଆ ଇତ୍ୟାଦି ବିକ୍ରି କରି ଖୁସି ଅଛନ୍ତି। ସେହିପରି ଅନୁଗୁଳ ବଡଯୋରଡାର ଲିପିକା ପ୍ରଧାନ ବସ୍ତ୍ର, କନ୍ଧମାଳ ଟିକାବାଲିର ନର୍ମଦା ମଲ୍ଲିକ ହଳଦୀ, କୋଳଥ, ବିରି ଇତ୍ୟାଦି ଖାଦ୍ୟ ସାମଗ୍ରୀ,ପିପିଲି ନିଜିଗଡ କୁରକ୍ଷୀ ସଞ୍ଜୟ ପରିଡା ଟେରାକୋଟା ସାମଗ୍ରୀ,ହିନ୍ଦୋଳ ଢେଙ୍କାନାଳର ବେବିନା ରାଉତ ଟେଲରିଂ ସାମଗ୍ରୀ,,ରାୟଗଡା ର ଆପାଲାମା ପାଲାକା ଝାଡୁ ବ୍ୟବସାୟ କରିବାକୁ ଆସିଛନ୍ତି। ଏଠାରେ ପ୍ରଥମ ଥର ମେଳାରେ ବିକ୍ରୀ ଯେଉଁ ଭଳି ହେଉଛି ତାହା ସନ୍ତୋଷଜନକ। ଏଠାରେ ଯଦି ନିୟମିତ ମେଳା ହୁଅନ୍ତା ତେବେ ଲୋକ ଙ୍କୁ ଆକୃଷ୍ଟ କରିବ ଓ ଆମର ବ୍ୟବସାୟ ଭଲ ହେବ ବୋଲି କହିଛନ୍ତି ଏହି ସ୍ୱୟଂସହାୟକ ଗୋଷ୍ଠୀର ମା ମାନେ। ଖାଦ୍ୟ ମେଳା ମଧ୍ୟ ପର୍ଯ୍ୟଟକ ଙ୍କ ଆକର୍ଷଣର କେନ୍ଦ୍ର ସାଜିଛି। ଜିଲ୍ଲାପାଳ ଦିବ୍ୟଜ୍ୟୋତି ପରିଡାଙ୍କ ନିର୍ଦ୍ଦେଶ ଓ ଜିଲ୍ଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ ପ୍ରିୟରଞ୍ଜନ ପୃଷ୍ଟିଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ମିଶନଶକ୍ତିର ସମ୍ପୂର୍ଣ୍ଣ ଟିମ ମେଳାକୁ ସରସ ସୁନ୍ଦର କରିବାକୁ ଯତ୍ନବାନ ଅଛନ୍ତି।୨୦୦ ରୁ ଉର୍ଦ୍ଧ୍ୱ ଷ୍ଟଲ ଦର୍ଶକ ଓ ପର୍ଯ୍ୟଟକଙ୍କୁ ଆକୃଷ୍ଟ କରୁଛି। ପ୍ରତି ସଂଧ୍ୟାରେ ସୁଭଦ୍ରା ଶକ୍ତି ମେଳା ଷ୍ଟେଜରେ ସାଂସ୍କୃତିକ କାର୍ଯ୍ୟକ୍ରମର ମଧ୍ୟ ଆୟୋଜନ କରାଯାଇଛି।