ଜଳ ସେଚନ ବିହୀନ ତଡ଼ାସ୍ ଅଞ୍ଚଳ, ଦୁଃଖରେ କୃଷକ
ପୁରୀ : ପୁରୀ ଜିଲ୍ଲାର ତଡ଼ାସ୍ ନଦୀ ଅଞ୍ଚଳରେ ଜଳ ସେଚନ ସୁବିଧାର ଗୁରୁତର ଅଭାବ ଯୋଗୁଁ କୃଷକମାନଙ୍କର ଦୁର୍ଦ୍ଦଶା ଆଜି ମଧ୍ୟ ଅବ୍ୟାହତ ରହିଛି। ଚନ୍ଦନପୁରରୁ ରାମେଶ୍ୱର ରୋଡ୍ର ଉଭୟ ପାର୍ଶ୍ଵରେ ଥିବା ବିସ୍ତୃତ କୃଷି ଅଞ୍ଚଳରେ ରବି ଋତୁ ସମୟରେ ପର୍ଯ୍ୟାପ୍ତ ପାଣି ଯୋଗାଣ ନ ହେବାରୁ ଚାଷୀମାନେ ଗଭୀର ସମସ୍ୟାର ସମ୍ମୁଖୀନ ହେଉଛନ୍ତି। ଜଳ ସେଚନର କୌଣସି ସ୍ଥାୟୀ ବ୍ୟବସ୍ଥା ନ ଥିବାରୁ ଚାଷୀମାନେ ନଦୀର ନିମ୍ନାଞ୍ଚଳରୁ ପ୍ରାୟ ୨ କିଲୋମିଟର ଦୂର ପର୍ଯ୍ୟନ୍ତ ପମ୍ପଯନ୍ତ୍ର ସହାୟତାରେ ପାଣି ଉଠାଇ ଧାନ ଚାଷ କରୁଛନ୍ତି। ଏହି ଅସ୍ଥାୟୀ ବ୍ୟବସ୍ଥା ଚାଷୀମାନଙ୍କ ଉପରେ ଭାରି ଆର୍ଥିକ ଓ ଶାରୀରିକ ଭାର ସୃଷ୍ଟି କରୁଛି। ବଂବରଡ଼ା, ସୁକଳ, ତିଆରପାରି (ତଡ଼ାସ୍ ପାରି), ପ୍ରଚଣ୍ଡପୁର ଓ ନଡ଼ାଖଣ୍ଡ ଭଳି ମୌଜାରେ ବସବାସ କରୁଥିବା ଶତାଧିକ କୃଷକ ଏହି ସମସ୍ୟାରେ ପୀଡ଼ିତ। ଏଠାରେ ଜଳ ସେଚନ ପାଇଁ କେନାଲ୍ ବ୍ୟବସ୍ଥା ଥିଲେ ମଧ୍ୟ ଦୀର୍ଘଦିନ ଧରି ରକ୍ଷଣାବେକ୍ଷଣ ଅଭାବରୁ ଏହା ଅଚଳ ହୋଇପଡ଼ିଛି। ଫଳସ୍ୱରୂପ ଚାଷୀମାନେ ଇନ୍ଧନ, ଯନ୍ତ୍ରପାତି ଓ ଶ୍ରମରେ ଅତ୍ୟଧିକ ଖର୍ଚ୍ଚ କରି ଚାଷ କରିବାକୁ ବାଧ୍ୟ ହେଉଛନ୍ତି। ଏହି ପ୍ରସଙ୍ଗରେ ବିଜେପି କୃଷକ ମୋର୍ଚ୍ଚା, ଓଡ଼ିଶାର ରାଜ୍ୟ ସମ୍ପାଦକ ପ୍ରଶାନ୍ତ ସ୍ୱାଇଁ (ଲୁଲୁ) ଆଜି ଜଳସମ୍ପଦ ବିଭାଗର ମୂଖ୍ୟ ସଚିବଙ୍କୁ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ପତ୍ର ଲେଖି ପରାମର୍ଶ ଦେଇଛନ୍ତି। ପତ୍ରରେ ସେ ଉଲ୍ଲେଖ କରିଛନ୍ତି ଯେ ପୂର୍ବରୁ ବାରମ୍ବାର ଏହି ସମସ୍ୟା ସମ୍ପର୍କରେ ଅବଗତ କରାଯାଇଥିଲେ ମଧ୍ୟ ଏପର୍ଯ୍ୟନ୍ତ କୌଣସି ପଦକ୍ଷେପ ଗ୍ରହଣ କରାଯାଇନଥିବା ଅତ୍ୟନ୍ତ ଦୁଃଖଦ। ଏହି ଅବହେଳା ଫଳରେ କୃଷକମାନଙ୍କର ଅର୍ଥନୈତିକ କ୍ଷତି ହେଉଥିବା ସହ ଗ୍ରାମାଞ୍ଚଳରୁ ପୁଣି ଦାଦନ ଯିବା ଆଶଙ୍କା ମଧ୍ୟ ସୃଷ୍ଟି ହେଉଛି ବୋଲି ସେ କହିଛନ୍ତି। ଶ୍ରୀ ସ୍ୱାଇଁ ବିଭାଗକୁ ତଡ଼ାସ୍ ନଦୀର ପାଣି ପ୍ରବାହ, କେନାଲ୍ ଓ ନଦୀ ସ୍ରୋତର ତୁରନ୍ତ ମୂଲ୍ୟାଙ୍କନ କରି ଜଳସେଚନ ସମୟରେ ଅବରୋଧ ସ୍ଥାନ ଚିହ୍ନଟ କରିବା, କେନାଲ୍ର ମରାମତି, ଡ୍ରେଜିଂ ଓ ଉନ୍ନତିକରଣ କରି ରବି ଋତୁରେ ନିରନ୍ତର ପାଣି ଯୋଗାଣ ନିଶ୍ଚିତ କରିବା ପରାମର୍ଶ ଦେଇଛନ୍ତି। ଏହା ସହ ଚେକ୍ ଡ୍ୟାମ୍ କିମ୍ବା ଲିଫ୍ଟ ଇରିଗେସନ୍ ଯୋଜନା ଭଳି ସ୍ଥାୟୀ ବ୍ୟବସ୍ଥା କାର୍ଯ୍ୟକାରୀ କରିବା, ସ୍ଥାନୀୟ କୃଷକମାନଙ୍କ ସହ ଆଲୋଚନା କରି ସମାଧାନ ନିଶ୍ଚିତ କରିବା ଓ ଆଗାମୀ ବଜେଟ୍ରେ ଏହି ଅଞ୍ଚଳକୁ ଅଗ୍ରାଧିକାର ଦେଇ ଆବଶ୍ୟକ ଅର୍ଥ ବ୍ୟବସ୍ଥା କରିବାକୁ ଦାବି କରିଛନ୍ତି। ସେ ୩୦ ଦିନ ମଧ୍ୟରେ କାର୍ଯ୍ୟାନୁଷ୍ଠାନର ଅଗ୍ରଗତି ସମ୍ପର୍କରେ ସୂଚନା ଦେବାକୁ ଅନୁରୋଧ କରିଥିବା ବେଳେ, ବିଜେପି କୃଷକ ମୋର୍ଚ୍ଚା କୃଷକ କଲ୍ୟାଣ ପାଇଁ ସର୍ବାଙ୍ଗୀଣ ସହଯୋଗ କରିବାକୁ ପ୍ରସ୍ତୁତ ବୋଲି ଜଣାଇଛନ୍ତି। ଓଡ଼ିଶାର କୃଷି ଅର୍ଥନୀତିର ମେରୁଦଣ୍ଡ ସ୍ୱରୂପ ଏଭଳି ଅଞ୍ଚଳରେ ଜଳ ସେଚନ ସମସ୍ୟାର ସ୍ଥାୟୀ ସମାଧାନ ପାଇଁ ସରକାର ଶୀଘ୍ର ପଦକ୍ଷେପ ନେବେ ବୋଲି ସାଧାରଣରେ ଆଶା ପ୍ରକାଶ ପାଇଛି।
