ବଳଙ୍ଗା ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଡାକ୍ତର ନିଯୁକ୍ତି ଓ ଏହାକୁ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ପରିଣତ ପାଇଁ ଦାବି
ନିମାପଡା : ପୁରୀ ଜିଲ୍ଲାର ନିମାପଡ଼ା ବ୍ଲକ୍ ଅନ୍ତର୍ଗତ ବଳଙ୍ଗା ପ୍ରାଥମିକ ସ୍ୱାସ୍ଥ୍ୟ କେନ୍ଦ୍ର (ପିଏଚସି)ରେ ଦୀର୍ଘଦିନ ଧରି ଡାକ୍ତର ଓ ପାରାମେଡିକାଲ୍ କର୍ମଚାରୀ ନ ଥିବା ଯୋଗୁଁ ସ୍ଥାନୀୟ ଲୋକମାନେ ଭୟଙ୍କର ଅସୁବିଧାର ସମ୍ମୁଖୀନ ହେଉଛନ୍ତି। ଏହି ସମସ୍ୟାକୁ ନେଇ ବିଜେପି କୃଷକ ମୋର୍ଚ୍ଚା, ଓଡ଼ିଶାର ରାଜ୍ୟ ସମ୍ପାଦକ ପପ୍ରଶାନ୍ତ ସ୍ୱାଇଁ (ଲୁଲୁ) ସରକାରୀ ସ୍ତରରେ ଅବିରତ ଫଲୋ-ଅପ୍ କରୁଛନ୍ତି। ଗତ ୪ ଜୁଲାଇ ୨୦୨୫ରେ ପ୍ରଶାନ୍ତ ସ୍ୱାଇଁ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗକୁ ଲିଖିତ ଚିଠି ଦେଇ ବଳଙ୍ଗା ପିଏଚସିରେ ତୁରନ୍ତ ଯୋଗ୍ୟ ଡାକ୍ତର ଓ କର୍ମଚାରୀ ନିଯୁକ୍ତି ସହ ଏହାକୁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର (ସିଏଚସି)ରେ ଅପଗ୍ରେଡ୍ କରିବା ଦାବି ଉଠାଇଥିଲେ। ସେହି ଚିଠିରେ ଓଡ଼ିଶା ବିଧାନସଭାର ଶେଷ ଦୁଇଟି ସତ୍ରରେ ସ୍ୱାସ୍ଥ୍ୟମନ୍ତ୍ରୀଙ୍କ ଦ୍ୱାରା ଦିଆଯାଇଥିବା ଆଶ୍ୱାସନାକୁ ସ୍ମରଣ କରାଯାଇଥିଲା। ଏହା ପରେ ରାଷ୍ଟ୍ରୀୟ ସ୍ୱାସ୍ଥ୍ୟ ମିଶନ୍ (ଏନଏଚ୍ଏମ୍)ର ଅତିରିକ୍ତ ନିର୍ଦ୍ଦେଶକ (ପ୍ରଶାସନ) ଶ୍ରୀମତୀ ଏଲ୍ଲୋରା ଭାରତୀ ଜେନା ଗତ ୧୨ ଜୁଲାଇ ୨୦୨୫ରେ ଏହି ଚିଠିକୁ ସ୍ୱାସ୍ଥ୍ୟ ବିଭାଗକୁ ପ୍ରେରଣ କରି ଉଚିତ ପଦକ୍ଷେପ ନେବାକୁ ଅନୁରୋଧ କରିଥିଲେ। କିନ୍ତୁ ପାଞ୍ଚ ମାସ ଅତୀତ ହୋଇଯାଇଥିଲେ ସୁଦ୍ଧା କୌଣସି ଦୃଶ୍ୟମାନ କାର୍ଯ୍ୟ ଆରମ୍ଭ ହୋଇନାହିଁ। ଏହି ପରିସ୍ଥିତିରେ ପ୍ରଶାନ୍ତ ସ୍ୱାଇଁ ୧୨ ଡିସେମ୍ବର ୨୦୨୫ରେ ପୁନଃ ଏକ ଫଲୋ-ଅପ୍ ପତ୍ର ଦେଇ ସ୍ୱାସ୍ଥ୍ୟ ବିଭାଗ, ଏନଏଚ୍ଏମ୍ ମିଶନ୍ ଡାଇରେକ୍ଟର ଓ ଉଚ୍ଚପଦସ୍ଥ ଅଧିକାରୀମାନଙ୍କୁ ୧୫ ଦିନ ମଧ୍ୟରେ ଲିଖିତ ଉତ୍ତର ଦେବାକୁ ଦାବି କରିଛନ୍ତି। ସେ କହିଛନ୍ତି, “ବଳଙ୍ଗା ଓ ଆଖପାଖ ଅଞ୍ଚଳର ଲୋକମାନଙ୍କୁ ଗୁଣବତ୍ତାପୂର୍ଣ୍ଣ ସ୍ୱାସ୍ଥ୍ୟ ସେବା ଦେବା ସରକାରଙ୍କ ନୀତିଗତ ଦାୟିତ୍ୱ। ବିଧାନସଭାରେ ଦିଆଯାଇଥିବା ଆଶ୍ୱାସନା କାଗଜରେ ସୀମିତ ରହିଲେ ଚାଲିବ ନାହିଁ।” ଏହି ମାମଲାକୁ ନେଇ ନିମାପଡ଼ା ଅଞ୍ଚଳରେ ରାଜନୈତିକ ଉଷ୍ମତା ମଧ୍ୟ ବୃଦ୍ଧି ପାଇଛି। ପୂର୍ବତନ ବିଧାୟକଙ୍କ ଦ୍ୱାରା ଅନ୍ଦୋଲନ ଚେତାବନୀ ଉପରେ ଆସିଥିବା ପ୍ରତିକ୍ରିୟାକୁ ନେଇ ସାମାଜିକ ଗଣମାଧ୍ୟମରେ ବାକ୍ବିତର୍କ ଦେଖାଦେଇଛି। ତଥାପି ସ୍ଥାନୀୟ ଲୋକମାନଙ୍କର ମୂଳ ଦାବି—ଡାକ୍ତର ନିଯୁକ୍ତି ଓ ପିଏଚସି ରୁ ସିଏଚସି ଅପଗ୍ରେଡ୍—ଏପର୍ଯ୍ୟନ୍ତ ଅପେକ୍ଷାରେ ରହିଛି। ସ୍ଥାନୀୟ ଲୋକମାନେ ଆଶା କରୁଛନ୍ତି ଯେ ସରକାର ଶୀଘ୍ର ପଦକ୍ଷେପ ନେଇ ବଳଙ୍ଗା ପିଏଚସିକୁ ସକ୍ରିୟ କରିବେ ଏବଂ ଦୀର୍ଘଦିନର ସ୍ୱାସ୍ଥ୍ୟ ସମସ୍ୟାର ସ୍ଥାୟୀ ସମାଧାନ କରିବେ।
